Lýðræði Samfylkingarinnar

Landsþing Samfylkingarinnar verður haldið um næstu helgi. Samt er forysta Samfylkingarinnar búin að kynna kosningastefnuskrá flokksins í umhverfismálum og núna í málefnum barna. ISG&co troða stefnumálunum ofan í kokið á eigin flokksmönnum sem ekkert hafa um það að segja hvernig kosningastefnuskráin lítur út - að því að mér virðist umboðslaust. Er ekki innmúraður í Samfylkinguna - sem betur fer. VG, Íhaldið og Framsókn halda landsþing, flokksþing eða hvað sem samkomurnar heita, fara yfir drög að ályktunum, sem svo eru samþykktar. Upp úr þeim eru svo kosningastefnuskrár unnar, sem hljóta kynningu. Ef þetta eru samræðustjórnmál, þá verð ég að segja nei takk.

Skattaskýrslan búin

Mikið ofsalega er orðið þægilegt að fylla út skattaskýrsluna. Ef ekki væri uppgjörið á bílnum, þá er þetta nákvæmlega ekkert mál. Seldum tvær íbúðir og það var allt saman rétt forskráð, svo maður þurfti bara að bæta inn kostnaði til fasteignasala. Vonandi heldur þetta áfram á þessari braut og væri spurning hvernig hægt væri að einfalda þetta bílauppgjör. Þarna er viðskiptatækifæri fyrir olíufélögin og verkstæðin...