Skítugu börnin hennar Evu vel falin

Helgi Hjörvar og Mörður Árnason, þeir þingmenn Samfylkingarinnar sem mér hefur fundist stuðla hvað mest að minnkandi tiltrú almennings á Alþingi eru líklegast komnir í tjáningarbindindi. Hvort sem maður fylgist með fjölmiðlum eða heimasíðum þeirra heyrist lítið frá þeim. Reyndar er ein lítil grein frá Helga í Blaðinu í dag en annars ekkert.

Ætli grafalvarleg staða Samfylkingarinnar í skoðanakönnunum, fyrirbæri sem þeir hafa þá óbilandi trú á og miða alla stefnumótun sína við, hafi opnað augu einhverra ráðandi manna innan flokks fyrir því að svona framkoma er ekki vænleg til árangurs. Framkoma þeirra hefur gert það að verkum að það er afar erfitt að bera þá virðingu fyrir flokknum sem eðlilegt ætti að vera. Hika ekki við að bera rangfærslur á borð og snúa út úr öllu á þann hátt að þeim hefði líklegast verið vísað úr Morfískeppni. Össur vil ég ekki setja í sama pott, þótt hann fari oft mikinn. Þetta er slæmt fyrir góða liðsmenn eins og Jóhönnu, heiðarlegan hugsjónarmann, sem viðurkennir það sem vel er gert um leið og hún gagnrýnir. Á þeirri gagnrýni er hægt að taka mark á.

Þetta er kannski til marks um að í neyðinni sé ISG loksins komin með einhver tök á sínu fólki eða hvað????????

Þægilegt að vera ekki lengur á nöglum

Hef verið á harðkornadekkjum í vetur. Mæli með þeim. Þau gefa gott grip, án þess að fela fyrir okkur að það sé hálka, eins og ég hef oft upplifað með naglana.

Tími nagladekkjanna er liðinn

Jákvætt og líklegt til árangurs

Þessar tillögur um jafnréttisvottun launa eru afar jákvæðar og sýna hvað grasrótarstarf getur haft mikil og góð áhrif, en tillagan kom víst fyrst upp í bíltúr sem félagsmálaráðherra fór í með einum flokksmanni Framsóknar. Þessi nálgun er mun líklegri en beinar stjórnvaldsþvinganir til árangurs og í anda verkefnisins "Einfaldara Ísland". Ekki vildi ég vera forstjóri síðasta fyrirtækisins í einhverri grein sem væri ekki kominn með vottun...

Vottun jafnra launa undirbúin

Sjávarútvegsmál - verum sanngjörn

Í sakleysi mínu var ég að úrskýra á bloggsíðu Sóleyjar Tómasdóttur, vinkonu minnar, hver stefna okkar Framsóknarmanna væri í auðlindamálum. Kemur þá inn Árni nokkur Gunnarsson, og sakar Framsókn um að vera vísvitandi að blekkja þjóðina og ætla, þvert á það sem hún hefur sagt, að tryggja eignarhaldið á handhöfum veiðiheimilda. Restin af hans málflutningi dæmir sig sjálfur og hann sjálfan.

Ályktanir Framsóknar í öllum auðlindamálum er skýr. Framsókn vill að í stjórnarskrá standi "Auðlindir landsins eru sameign þjóðarinnar."

Held að það sé rétt að rifja það upp í þessu sambandi að árið 1991 var í rauninni framkvæmdur sjá gjörningur sem þjóðinni hefur sviðið mest í tengslum við sjávarútvegsmálin. Ríkisstjórn íhaldsins og krata breytti lögum um stjórn fiskveiða á þann hátt að hægt var að taka veð í aflaheimildum. Að því sem ég hef heyrt var það til að gera bönkunum mögulegt að lána meira til fyrirtækja sem svo fóru bara enn rösklegar á hausinn. Framsókn kom ekki að þeim gerningi.

Við þann gjörning breyttust allar forsendur, eins lítil umræða og var um hann. Verð á kvóta byggðist ekki lengur á rekstrarreikningi, heldur efnahagsreikningi, einfaldað sagt þurftu tekjurnar nú að standa undir vöxtum af verðinu á veiðiheimildum, en ekki öllu verðinu. Framsalið var svo forsenda hagræðingarinnar sem allir voru sammála um að þyrfti að eiga sér stað í greininni. Sú hagræðing gat ekki átt sér stað nema einhver samþjöppun ætti sér stað í togaraflotanum. Ég fæ trauðla séð að þessari þróun verði snúið handvirkt til baka. Hægt væri að vinda ofan af honum á löngum tíma, ef það væri talið skynsamlegt, en það skynsamlegasta að mínu viti er að skipta fiskveiðilögsögunni í tvennt, svæði þar sem botnvörpur og þess háttar veiðarfæri eru leyfð, og önnur þar sem þau geru bönnuð. Þannig er smábátaútgerðinni gefin góð veiðisvæði sem hún getur aflað vel á og hagnast og búsvæði sjávarins er vernduð um leið.

Í dag hefur langtum meirihluti veiðiheimildanna skipt um hendur og þeir sem farið hafa út úr greininni með fullar hendur fjár, fólki til öfundar, og um leið er greinin orðin talsvert skuldsett. Þrátt fyrir það skilar hún ágætri afkomu til eigenda og þjóðarbúsins og endurfjárfesting með þeim peningum sem farið hafa út úr greininni, hafa staðið undir miklu af þeim arðbæru fjárfestingum sem gerðar hafa verið í öðrum greinum íslensks atvinnulífs á undanförnum árum. Eru bankarnir besta dæmið þar um.

Þannig að dómsdagsraus um að Framsókn beri ábyrgð á öllu sem aflaga hefur farið í sjávarbyggðum landsins er ekki rétt. Munum líka að það eru margar blómlegar sjávarbyggðir sem eru enn að eflast og dafna. Fögnum því.

Epli og appelsínur

Þegar verðbólga er borin saman á milli landa gleymist yfirleitt að taka fram að húsnæðisliðurinn er ekki með í erlendu vísitölunum. Þess vegna á að bera saman 3,2% verðbólgu við nágrannalöndin, ekki 5,3%. Kristinn Pétursson skrifar ágætlega um áhrif húsnæðisins í þessu spili. Þessu þarf að breyta.

Vísitala neysluverðs hækkaði um 0,6%

Það sem snýr að börnum

Fór á hundavaði yfir kosningastefnuskrá Framsóknar og tók saman þá punkta sem ég fann í snarhasti sem hægt er að tengja beint við börn og velferð þeirra.

Þetta er glæsilegur listi og stenst allan samanburð við lista Samfylkingarinnar. Auk þessa er hátt atvinnustig og góð kjör grundvallaratriði í öllu starfi Framsóknar, sem er stærsta velferðarmálið.

Í einhverri röð

• Ókeypis tannvernd til 18 ára aldurs og auknar niðurgreiðslur á tannviðgerðum.
• Lengja fæðingarorlof í 12 mánuði.
• Vinna að styttingu vinnutíma og auknum sveigjanleika í samvinnu við aðila vinnumarkaðarins.
• Draga enn frekar úr tekjutengingum barnabóta.
• Lækka virðisaukaskatt á lyfjum og barnavörum 24,5% í 7%.
• Auka þátttöku hins opinbera í nauðsynlegum ferðakostnaði sjúklinga.
• Fjölbreytt meðferðarúrræði fyrir unga fíkla.
• Efla enn frekar allar forvarnir og vinna að bættri lýðheilsu þjóðarinnar
• Gjaldfrjáls leikskóli.
• Aukin samvinna milli skólastiga.
• Tengja íþrótta-, tómstunda- og æskulýðsstarf skóladeginum.
• Fjölbreyttir framhaldsskólar þar sem starfsnámi er gert hátt undir höfði.
• Sporna við brottfalli nemenda af erlendum uppruna úr framhaldsskólum.
• Efla náms- og starfsráðgjöf til að vinna gegn brottfalli nemenda.
• Tryggja að nám og starfsreynsla erlendis sé metin að verðleikum.
• Tryggja jarðveg fyrir áframhaldandi þróun og grósku í skólastarfi.
• Auka fræðslu sem eykur skilning og eyðir fordómum í samfélaginu.
• Vaxtabætur verði hækkaðar.
• Húsaleigubætur verði hækkaðar.
• Tryggja jafnan rétt allra til þátttöku í íþróttum og tómstundum
• Koma á sjóði til að efla starf sveitarfélaga í íþrótta- og tómstundamálum.
• Bæta fagmenntun leiðbeinenda í íþrótta-, tómstunda- og æskulýðsstarfi.
• Skapa íþróttahreyfingunni aðstæður til að sinna uppeldis-, forvarna- og félagshlutverki sínu.
• Stefna að því að auka fjármagn og mannafla lögreglu og tryggja þannig að aðbúnaður lögreglu til að sinna verkefnum sínum verði ávallt eins og best verður á kosið.
• Skapa lögreglunni skilyrði til að sinna aukinni grenndargæslu og forvarnastarfi.
• Vinna skipulega gegn starfsemi glæpahringja hér á landi, m.a. til að koma í veg fyrir aukinn innflutning fíkniefna og mansal.
• Herða baráttuna gegn fíkniefnum, innflutningi þeirra, dreifingu og notkun.
• Koma á fót ungmennadómstóli sem beitt geti meðferðarvistun í stað fangelsisrefsingar.
• Hækka þróunaraðstoð í 0,35% af vergri landsframleiðslu eigi síðar en 2009 og í 0,7% árið 2015 í samræmi við markmið Sameinuðu þjóðanna.
• Að verkefni Íslensku friðargæslunnar verði einungis borgaralegs eðlis og til hennar veljist jafnt konur og karlar.
• Auka áherslu á starf innan stofnana Sameinuðu þjóðanna, t.d. Barnahjálpar SÞ (UNICEF) og Þróunarsjóðs fyrir konur (UNIFEM)