Við hverja er verið að semja?

Mér finnst svolítið skrítin sú nálgun sem verkalýðshreyfingin er að taka á kjarasamningaviðræðurnar.

Ef hún fær ekki ríkisstjórnina til að breyta sinni pólitík ætlar hún ekki að tala við SA! Ég hélt í einfeldni minni að SA væri sá aðili sem verkalýðshreyfingin væri að semja við!

Kjósendur, þmt launþegar, semja við stjórnmálaflokkana á fjögurra ára fresti, í kosningum. Allir flokkar lögðu fram skattatillögur í kosningunum, misgreinargóðar þó og mis-misvísandi og á grundvelli þeirra var stjórnarsáttmáli þeirra flokka sem eru í ríkisstjórn byggður. Vettvangur stjórnmálamannana er svo Alþingi, sem ákvarðar skattana og er nýbúið að ákvarða rammann um skattheimtuna fyrir næsta ár, í fjárlögum. Út frá honum eiga geta aðilar vinnumarkaðarins að geta gengið.

Annað ferli er óheppilegt og skapar bara glundroða. Það er hlutverk Alþingis að hafa þennan ramma eins góðan og skýran og hægt er til að samningaviðræðurnar geti orðið eins einfaldar og unnt er, en allur glundroði frá hendi ríkisstjórnarinnar, skilar sér beint inn í kjaraviðræður sem enn meiri glundroði þar sem óþekktu stærðunum sem fjallað er um fjölgar bara við svona nálgun.

Við skulum ekki gleyma því að öll óvissa og glundroði skilar sér sem hærri álagning, verðlag og þar með verðbólga, sem kemur öllu launafólki illa, sérstaklega þeim sem minnst hafa og skulda mest.

En það sem upp úr stendur er, að kjarasamningar eru á milli vinnuveitenda og launþega. Ekki annarra. Þessi hliðarleikur verkalýðshreyfingarinnar er ekkert annað en birtingarmynd þeirrar litlu trúar sem hún hefur á ríkisstjórninni og stefnufestu hennar.

Athugasemdir

[Theódór Norðkvist, 8.1.2008 kl. 11:58]

Ójöfnuðurinn hefur verið búinn til í gegnum skattkerfið. Er þá ekki sjálfsagt að leiðrétta hann í gegnum skattkerfið?

[Gestur Guðjónsson, 8.1.2008 kl. 13:16]

Hvernig færð þú það út? Hefur launaskriðið ekki verið mest í þeim stéttum sem hafa hæstu launin, en minnst meðal láglaunastéttanna?

Sú þróun kemur skattkerfinu ekkert við, þótt við getum alveg verið sammála um að skattleysismörkin mættu vissulega vera hærri.

[Theódór Norðkvist, 8.1.2008 kl. 13:42]

Hátekjuskattur hefur verið lagður niður. Einyrkjum í rekstri hefur verið gert kleift að stofna einkahlutafélög og borga 18% skatt af mestöllum tekjum sínum. Þeir sem vinna við að kaupa og selja hlutabréf borga einungis 10% fjármagnstekjuskatt. Á sama tíma hefur persónuafsláttur verið frystur og þjónustugjöld í heilbrigðisgeiranum stórhækkuð.

Þannig hefur skattkerfið verið notað til að auka ójöfnuð. Það er rétt að launaskriðið hefur verið mikið hjá hálaunahópum, en þeir hafa líka í stórum stíl flúið yfir í einkahlutafélögin og verktöku og þannig getað borgað lægri skatt.

[Gestur Guðjónsson, 8.1.2008 kl. 13:53]

Hátekjuskattur hefur verið lagður niður, minnkar það jaðarskattaáhrifin og ætti að halda fleirum í landinu og í launþegaforminu, sem gefur heilt yfir meiri tekjur til velferðarinnar. Það eru sömu jaðarskattaáhrif og ég gagnrýni ASÍ fyrir að leggja til með þessari 20.000 kr tillögu sinni, þar sem jaðarskatturinn verður 48%.

Ríkisskattstjóri á að ganga harðar eftir því að menn reikni sér laun, bæði einyrkjum og fjármagnstekju"þegum".

Sammála þér með persónuafsláttinn. Framsókn stóð ekki nægjanlega á móti íhaldinu þar.