Frjálsíþróttasumarið byrjar með látum

Það er gaman að sjá hvað frjálsíþróttamenn eru að koma vel undan vetri.

Met Björns Víkings í 400 grind, einni alerfiðustu hlaupagreinni er stórglæsilegt og met Kára Steins Karlssonar í 10.000 m lofa góðu fyrir sumarið. Býst við að Kári eigi eftir að bæta fleiri met í sumar og aldursflokkametin eru þegar farin að hrynja í hrönnum.

Hæst ber náttúrulega Íslandsmet Bergs Inga Péturssonar í sleggjukasti, en hann er búinn að þríbæta það í vor og náði núna síðast ólympíulágmarkinu, með 74,48 m, en lágmarkið var 74 m.

Fyrir var Þórey Edda búin að ná lágmarkinu í stöng í fyrrasumar.

Það skiptir miklu máli að ná lágmörkum í tíma, þannig að nú getur Bergur miðað við að toppa á réttum tíma í stað þess að þurfa að vera á toppnum í allt sumar að rembast við lágmarkið og ná svo kannski ekki sínu besta á leikunum.

Það verður gaman að sjá hvort fleiri bætist í ólympíuhópinn, en það er alveg greinilegt að sumarið er að byrja með látum og alveg þess virði að fylgjast með því, svo ekki sé meira sagt.

Athugasemdir

[Árni Gunnarsson, 27.5.2008 kl. 13:11]

Sannarlega ánægjulegt að sjá ný nöfn afreksmanna í frjálsum íþróttum.

Bergur er spennandi vonarstjarna og ungur að aldri. Og rétt er það að nú tekur við æfingatímabil sem er afar viðkvæmt í tengslum við erfitt mót.