Ítrekaðir sögufalsanir íhaldsins um Íbúðalánasjóð

Í krossferð íhaldsins gegn Íbúðalánasjóði hafa þeir ítrekað haldið því fram að það hafi verið Íbúðalánasjóður sem hafi riðið á vaðið með 90% lánin. Þetta er einfaldlega rangt, ÍLS hækkaði sitt lánshlutfall í 90% 6. des 2004, löngu eftir að bankarnir fóru inn á markaðinn, sem gerðist í ágúst og jókst svo stig af stigi, eins og lýst var í peningamálum.

Sem betur fer fylgdi Íbúðalánasjóður bönkunum eftir til að jafna þau kjör sem landbyggðin og höfuðborgin bjó við, en þróun hlutfallsins og hámarkslánanna hefur verið eftirfarandi:

Dagur	Hlutfall	Hámark
5.6.2004	65%	9,7
5.10.2004	65%	11,5
6.12.2004	90%	14,9
12.4.2005	90%	15,9
12.4.2006	90%	18
27.6.2006	80%	17
28.2.2007	90%	18
3.7.2007	80%	18

Vonandi hætta Sjálfstæðismenn að fara með þessar rangfærslur, svo umræðan um eggið og hænuna í því hver byrjaði að dæla peningum inn í hagkerfið færist á rétt plan. Einnig skora ég á Jóhönnu að standa keik í sinni baráttu við íhaldið, sem vill græðgisvæða Íbúðalánasjóð.

Athugasemdir

[Skákfélagið Goðinn, 28.5.2008 kl. 21:55]

Það er alveg stórmerkilegt hve sjálfstæðismönnum er illa við íbúðalánasjóð. Núna sést vel hve mikilvægur sjóðurinn er fyrir landsmenn.

Héldu menn virkilega að hægt væri að treysta bönkunum fyrir öllum húsnæðislánamarkaðinum ? Jóhanna er eini ljósi punkturinn í stjórnarliðinu.

[Heimir Eyvindarson, 28.5.2008 kl. 23:44]

Góð færsla félagi. Eftir allt saman verður maður líklega að lúta í gras og þakka framsókn eitthvað; að standa vörð um ÍLS. Takk .

[Gestur Guðjónsson, 28.5.2008 kl. 23:59]

Við skulum vona að Jóhanna standi sig einnig. Hef trú á henni.

[Guðrún María Óskarsdóttir., 29.5.2008 kl. 01:58]

Sæll Gestur.

Þetta er allt rétt hjá þér.

kv.gmaria.