Íhaldið er þarna undir niðri

Í ályktunardrögum fyrir landsfund Sjálfstæðisflokksins er ekki margt markvert að finna annað en lof um eigin menn, en þar er þó eftirfarandi að finna:

"Tímabært er að losa um eignarhald hins opinbera á orkufyrirtækjunum og leysa úr læðingi krafta einkaframtaksins, svo þessi fyrirtæki fái að fullu notið sín í útrás íslenskrar sérþekkingar. Landsfundur leggur til að stefnt verði að því að færa eignarhald opinberra aðila að orkufyrirtækjunum yfir til einkaaðila, þó þannig að gætt sé vandlega að samkeppnis- og jafnræðissjónarmiðum."

Sjálfstæðisflokkurinn ætlar sem sagt að selja Landsvirkjun, sem í krafti stöðu sinnar sem sameign þjóðarinnar hefur fengið að beita eignarnámi og haft aðgengi að auðlindum þjóðarinnar langt, langt umfram það sem nokkurt einkafyrirtæki hefði nokkurntíma fengið. Þetta er reyndar í samhljóm með annarri ályktun þeirra.

"Landsfundur telur að skynsamleg og hagkvæm nýting náttúruauðlinda Íslands verði best tryggð með því að nýtingar- og afnotarétturinn sé í höndum einstaklinga."

Þetta skýrir afstöðu þeirra í þjóðlendumálinu. Þeir ætla sem sagt að hafa sem mest land undir ríkið og koma í hendur Landsvirkjun áður en hún verður seld. Gamla íhaldið er þarna undir fínu klæðunum, það er alveg greinilegt...

Geir: Eðlilegt að ríkið tryggi öllum lágmarkslífeyri úr lífeyrissjóði

Athugasemdir

[Guðmundur Jónas Kristjánsson, 12.4.2007 kl. 21:30]

Ef Sjálfstæðisflokkurinn hefði einn ráðið för væri löngu búið að einkavæða
Landsvirkjun. Það hefur honum hins vegar alls ekki tekist. Þökk sé Framsókn!

[G. Valdimar Valdemarsson, 13.4.2007 kl. 09:53]

Við skulum ekki gleyma því að Katrín varaformaður VG útilokar ekki að selja Landsvirkjun, í reynd er það bara Framsóknarflokkurinn sem hefur með afgerandi hætti ályktað um að Landsvirkjun verði ekki einkavædd og vatns og virkjanaréttind færð einstaklingum á silfurfati.   Setjum X við B og tryggjum að þjóðin eigi og njóti arðsins af virkjununum.