Endurnýjun með reynslu

Þrátt fyrir að alger endurnýjun hafi orðið á efstu mönnum á lista Framsóknar, er þetta síður en svo reynslulaus listi.

Gunnar Bragi hefur verið leiðtogi Framsóknarmanna í sveitarstjórn Skagafjarðar um árabil og virkur í flokknum lengi.

Guðmundur drakk stjórnmálin með móðurmjólkinni og Sindri hefur verið virkur í bændasamtökunum um árabil.

Með kjarnakonunni Elínu Líndal er þetta vösk sveit reyndra manna sem munu afla sér fylgis um allt kjördæmið.

Fyrst og fremst þakklátur

Lítt marktækt hættumat fyrir siglingar

Ég fagnaði því að unnið skyldi hættumat fyrir Ísland. Hélt ég að það væri hægt að nota sem grunngagn við ákvarðanir um öryggisráðstafanir sem víðast í samfélaginu, t.d. við siglingavernd, þar sem ég starfa, hef unnið þónokkur hættumöt og verndaráætlanir byggðar á þeim. Sama ætti að eiga við um flugið.

Nú er hættumat fyrir Ísland komið út og kemur fram að við vinnslu þess hafi verið talað við fjölmarga aðila, en það stingur djúpt í augun að þar á meðal er ekki yfirvald siglingaverndarmála, Siglingastofnun, sem ber ábyrgð á hryðjuverkavörnum hafna og farskipa.

Sömuleiðis er talað við Flugstoðir ohf, en ekki Flugmálastjórn, sem er yfirvald flugverndarmála og ber ábyrgð á hryðjuverkavörnum flugvalla og loftfara!

Í hættumatinu er heldur ekkert fjallað um siglingavernd, bara siglingaöryggi og bara þá afmörkuðu hættu sem mengunarhætta og hætta á slysum við skemmtiferðaskip eru. Ef fjalla ætti um öryggismál, þe safety, en ekki security, skipa með þessum hætti, hefði nú ekki verið gustuk að tala einnig um öryggismál annarra sjófarenda eins og fiskimanna eða farmanna almennt? Ég veit ekki betur en það hafi verið sjómenn úr þessum stéttum sem hafa verið að farast hér við Ísland, ekki skemmtiferðaskipa eða olíuskipa.

Þetta þýðir í mínum augum að hættumatið, sem ég hélt reyndar að yrði alltaf að vera trúnaðargagn, en ekki auglýst skýrsla, getur ekki nýst sem grundvöllur að áhættumati siglingaverndar og er ég efins um að það geti nýst sem grundvöllur að áhættumati flugverndar.

Er þá eðlilegt að spurt sé hvort það hafi verið þess virði að fara  út í þennan leiðangur?

Fleira hættulegt en herir og hryðjuverk

Hverju er að treysta hjá VG?

Þótt ég fagni því að VG ætli ekki að standa í vegi fyrir uppbyggingunni í Helguvík, þótt þau hafi tækifæri til þess, hljóta kjósendur hreyfingarinnar að spyrja sig hvort þeir hafi keypt köttinn í sekknum.

Í sínum málflutningi átti einskis að láta ófreistað og ekkert að gefa eftir í blindri andstöðu við uppbyggingu iðnaðarstarfsemi sem gæti haft í för með sér mengun, en nú er komið í ljós að það var bara þá - áður en þau komust í ríkisstjórn, eins og Helgi Hjörvar sagði svo eftirminnilega um staðfestu Samfylkingarinnar.

Það er nefnilega auðveldara um að tala en í að komast.

„Ótrúlegt ábyrgðarleysi“

Jákvæð umhverfisáhrif bankahrunsins

Fína orðið yfir nægjusemi og nýtni er sjálfbærni, grundvallarorð í allri umhverfisumræðu. Nægjusemi og nýtni eru hugtök sem voru óttalega hallærisleg 2007, en eru núna komin á réttan stall, þannig að í umhverfislegu tilliti hefur bankahrunið afar jákvæð umhverfisleg áhrif.

Magn úrgangs sem berst til urðunar hefur snarminnkað, eldsneytiseyðsla minnkar og öll nýting hluta batnar.

Eins og ég hef áður skrifað, þá er árið 2008 líklegast mesta happaár íslensks samfélags. Það á bara eftir að líða svolítill tími áður en það verður almennt viðurkennt.

Leikskólar leita allra sparnaðarleiða

Sjálfstæðisflokkurinn enn og aftur til skaða í stjórnarskrármálum

Þessi framkoma Sjálfstæðisflokksins í stjórnarskrármálum er engin tilviljun. Hún er framhald þeirrar hegðunar sem flokkurinn hefur sýnt undanfarin ár og áratugi. Flokkurinn er valdaflokkur, hefur verið við völd og því eru allar breytingar ógn við þá stöðu.

Síðasta stjórnarskrárnefnd, undir formennsku Jóns Kristjánssonar, var komin að niðurstöðu í meira og minna öllum atriðum, þegar Sjálfstæðisflokkurinn fann stöðu forsetans sem tylliástæðu til að stoppa málið og Samfylkingin hafði ekki burði til að knýja framhald þeirrar vinnu í gegn, eitthvað sem Framsókn hafði þó þrek til að gera, enda nauðsyn á endurskoðun stjórnarskrárinnar þeim ljós.

Þótt það sé í hæsta máta einkennilegt að vera að keyra stjórnarskrárbreytingu um annað en stjórnlagaþing í gegn núna, rétt fyrir kosningar, verður að horfa á hegðun stjórnmálaflokkanna í því ljósi að nú sé loksins hægt að koma einhverjum breytingum á stjórnarskrá lýðveldisins í gegn um Alþingi án þess að ríkisstjórnarsamstarf við Sjálfstæðisflokkinn sé í hættu.

Umræðu um stjórnarskrárfrumvarp frestað

Góðar fréttir úr borginni

Stjórn Reykjavíkurborgar er vin í eyðimörk íslenskra stjórnmála og stjórnsýslu þessa dagana. Þar er svo sannarlega verið að taka rétt á hlutunum og er ég stoltur af því að vera hluti af þessum meirihluta Sjálfstæðismanna og Framsóknarmanna, en ég er varaformaður umhverfis- og samgönguráðs.

Í aðgerðaráætlun borgarinnar, sem sett var í gang við myndun nýja meirihlutans, var gefin út skýr lína, þar sem grunnþjónusta við íbúa er varin, gjaldskrár yrðu óbreyttar og störf borgarinnar yrðu vernduð, hefur reynst afar framsýnt og gott skref sem hefur gefið stórgóðan árangur, sem íbúar Reykjavíkur munu sjá enn frekar, þegar þeir bera sig saman við íbúa nágrannasveitarfélaganna á komandi ári. Hafa starfsmenn borgarinnar tekið boltann á lofti og unnið stórkostlegt starf, komið með fjölda hugmynda til viðbótar við hugmyndir kjörinna fulltrúa, útfært þær og komið í framkvæmd.

Ábyrg, hallalaus fjárhagsáætlun gerir borgina einnig í stakk búna til að mæta næsta ári, sem samkvæmt spám verður jafnvel enn þyngra.

Fjárframlög til Vinnuskólans, þessarar perlu í þjónustu Reykjavíkurborgar, eru varin, sem er góð forgangsröðun, en þar sem búast má við mikilli fjölgun vinnufúsra handa sem deila þarf laununum á, verður eilítið dregið úr þeirri vinnu sem í boði verður fyrir hvern og einn. En fyrst og fremst er gott að allir komist að sem vilja og mun Vinnuskólinn þar með nýtast sem forvörn fyrir sem flesta unglinga borgarinnar, sem munu læra garðyrkju og fleira nytsamlegt í gegnum heilbrigða vinnu.

Allir fá vinnu í vinnuskólanum

Trúverðug aðgerð

Þegar fréttin um yfirtöku Straums barst í fyrramorgun brá mér við og fannst hún skrítin, af hverju fjárfestingabanki, sem Seðlabankinn vildi ekki veita þrautavaralán vegna þess hversu lítil innlend starfsemi hans væri, skyldi vera yfirtekinn af íslenska ríkinu.

Gylfi Magnússon viðskiptaráðherra kom svo strax fram á Alþingi og í fjölmiðlum og útskýrði málið á skiljanlegan og traustan hátt.

Ég er sáttur við hans útskýringar og treysti því að ákvörðunin hafi verið rétt. Þær upplýsingar sem svo eru að berast núna styrkja það traust bara enn frekar.

Þvílíkur munur að hafa svona menn í ríkisstjórn.

Íbúðalánasjóður átti milljarða hjá Straumi

Flokkurinn fyrst - þjóðin svo

Það að Sjálfstæðismenn vilji ljúka þingstörfum nú er með ólíkindum, en eins og Geir H Haarde, formaður flokksins opinberaði svo vel um daginn, þarf Flokkurinn tíma til að halda Landsfund, sýsla í prófkjörum og móta stefnuskrá.

Á meðan á Róm bara að brenna, meðan Neró spilar á sína Sjálfstæðishörpu.

Fussumsvei.

Það sem við þurfum er að koma í gegn raunhæfum aðgerðum til að koma hjólum efnahagslífsins af stað á ný, svo sem fæst heimili þurfi neyðaraðstoð, sem einnig þarf að koma í gegn, með raunhæfum hætti, en ekki svona málþóf og bull.

Saka sjálfstæðismenn um málþóf

Undarleg þversögn í máli Straums Burðaráss

Ef Seðlabankinn neitar Straumi-Burðarási um þrautavaralán vegna þess að starfsemi bankans á Íslandi er svo lítil, af hverju er íslenska ríkið þá að yfirtaka bankann?

Ef ekki stendur til að stofna "Nýja Straum Burðarás" með tilheyrandi eiginfjárskuldbindingum ríkisins, ætti bankinn einfaldlega að vera á leiðinni í hefðbundna gjaldþrotameðferð, sem ekki kostar íslenska ríkið neitt að ráði og þá er mér þannig séð slétt sama, ef vel verður haldið á eignum þrotabúsins og þeim komið á gagnsæjan og heiðarlegan hátt í hendur nýrra eigenda.

Ef ekki er þetta þvílík vitleysa að það hálfa væri nóg og full ástæða til að taka mark á þessum Svía.

„Auknar líkur á þjóðargjaldþroti"

Hipp hipp hipp barbabrella einnar minnihlutastjórnar

Ríkisstjórnin ástundar afar grófa talnafölsun í sínum tillögum, þegar hún segist ætla að skapa 4.000 ríflega ársverk, því í raun eru hún bara að leggja fram tillögur um 2.373 störf, þar af eru 1.000 störf ágiskun um fjölgun í nýsköpunarfyrirtækjum og eins talsverður fjöldi verkefni sem þegar stóð til að fara í og var fyrir löngu komið í ferli eins og gerð snjóflóðavarnargarða.

Annað eru verkefni sem eru í farvatninu og hugsanlegir samningar sem ekki eru í höfn, ekki er búið að fjármagna og annar stjórnarflokkurinn ríkisstjórnarinnar er meira að segja á móti stórum hluta þeirra.

Sömuleiðis er verið að telja upp verkefni sem þegar var búið að skilgreina sem mótvægisaðgerðir vegna niðurskurðar á þorskkvóta.

Mér sýnast um 750-780 af þessum störfum vera raunverulega nýjar tillögur og þeim ber að fagna.

• Græni trefillinn - stígagerð ofl. í sveitarfélögum 230 ársverk, greitt af sveitarfélögum og ríki
• Hækkun endurgreiðslna vegna kvikmyndagerðar 120 - 150 ársverk
• Frumkvöðlasetur í Reykjavík 100 ársverk
• Sérfræðingar af atvinnuleysisskrá til nýsköpunarfyrirtækja 300 ársverk

Annað er endurupptalning, sem er hrein barbabrella.

Ætla að skapa 4000 ársverk