Styrk stoð efnahagslífsins

Þetta eru fréttirnar sem Ögmundur Jónasson vill útrýma úr íslenskum fjölmiðlum. Þessi fyrirtæki fremja nefnilega þann glæp að borga starfsmönnum sínum góð laun, betri laun en hann hefur getað náð fyrir sitt fólk og auðvitað er honum ógnað.

Sannleikurinn er auðvitað sá að þær skattgreiðslur sem fylgja þessari starfsemi, bæði frá fyrirtækjunum sjálfum og starfsmönnum þeirra gera það að verkum að ríkið getur yfir höfuð aukið velferðina. Tók saman fyrir nokkrum bloggum í hvað sá tekjuauki sem hefur komið í ríkissjóð á síðasta kjörtímabili hefur farið. Það er áhugavert að skoða

Hagnaður Kaupþings 20,3 milljarðar fyrstu 3 mánuði ársins

Nýr vefur um loftslagsmál

Í dag, á degi umhverfisins var vefurinn www.co2.is opnaður. Um er að ræða afar góðan og fræðandi vef um loftslagsmál, sem á eftir að verða sífellt umfangsmeiri í allri umræðu á komandi árum. Það eitt að öryggisráð Sameinuðu þjóðanna er farið að taka málið fyrir, er óræk sönnun þess að málið sé alvarlegt.

 Rak augun í magnaða staðhæfingu á vefnum:

"Orkufrekur iðnaður á Íslandi nýtur þess að vera knúinn af endurnýjanlegum orkugjöfum og því er útblástur vegna þessa iðnaðar hér miklu mun minni en þar sem jarðefnaeldsneyti er notað.  Ætla má að sparnaður á útblæstri, samanborin við kolaorku, muni ná um 10 milljón tonnum af CO2 af álvinnslunni einni saman. Það er hinn alþjóðlegi umhverfisparnaður sem fæst með því að keyra orkufrekan iðnað á endurnýjanlegum orkugjöfum."

Heildarlosun Íslendinga, að flugsamgöngum undanskyldum nemur samkvæmt vefnum 3,7 milljónum tonna árið 2005.

Það mætti því segja að vegna stóriðjunnar ættum við að eiga inni 6,3 milljóna tonna kvóta ónýttan. Athyglisvert

 

Kuðungurinn veittur Bechtel

Var þess heiðurs aðnjótandi að vera skipaður formaður úthlutunarnefndar Kuðungsins, umhverfisverðlauna Umhverfisráðuneytisins.

Við fórum í gegnum þær tilnefningar sem bárust og voru þær afar mismunandi. Þegar ég gerði grein fyrir vali okkar sagði ég meðal annars um Bechtel:

"Óháð því hvaða skoðun menn hafa á álverum og byggingu þeirra, er það einróma mat allra sem hafa kynnst þeirri sýn sem Bechtel hefur á umhverfismál og það verkskipulag sem fyrirtækið viðhefur til að ná þeim markmiðum sem fyrirtækið setur sér, að þar er um að ræða algerlega nýja tíma í verktakastarfsemi á Íslandi.

Hver einasti verkþáttur er metinn með tilliti til hugsanlegra umhverfisáhrifa, öryggis og fleiri atriða, áður en verk hefst og hverjum einasta starfsmanni gerð grein fyrir því til hvers er ætlast af honum og starfsmönnum veitt skýr heimild til að stöðva verk, séu forsendur breyttar á þann hátt að umhverfinu sé ógnað. Öll umgengni er til fyrirmyndar, úrgangur er flokkaður í þeim mæli að aðdáun vekur og fleiri atriði mætti nefna, fráveitu, vatnsveitu.

Allir undirverktakar undirgangast sömu reglur og hljóta kennslu og þjálfun áður en verk hefst, en eru ekki skammaðir eftir að óhapp hefur orðið. Ég veit að margir hafa fussað og sveiað í upphafi, en eftir þjálfun og kennslu sem fyrirtækið veitir er viðhorfið allt annað. Hvert einasta frávik og næstumfrávik er skráð, greint og við því brugðist, þannig að eftir er tekið.

Á þann hátt hefur Bechtel fært íslenskum verktakaiðnaði mikla þekkingu og reynslu á vinnubrögðum, sem eru til mikillar fyrirmyndar og vernda umhverfið, bæta öryggi og á endanum hagkvæmni, þar sem engin tími eða kostnaður fer í súginn vegna mengunaróhappa, vinnuslysa eða annarra tjóna.

Fumlaus og ákveðin vinnubrögð svífa yfir vinnusvæðinu og vonandi verður þessi viðurkenning til þess að vekja athygli sem flestra á þeim góða árangri sem Bechtel hefur náð og aðrir verktakar geta náð, tileinki þeir sér það verklag sem þeir hafa kynnt okkur í starfsemi sinni."

Til hamingju Bechtel

Einmana börn - ábyrgð foreldra og samfélagsins

Á ráðstefnu sem haldin var í vetur til að hvetja konur til að bjóða sig fram til Alþingis hélt Guðrún Helgadóttir meðal annarra framsögu um sína pólitísku þátttöku. Eins og svo oft áður kom hún kjarnanum í orð á einfaldan og beittan hátt, þegar hún sagði eitthvað á þá leið að konur hefðu í eigingirni sinni rokið út á vinnumarkaðinn þegar þær fengu frelsi til þess, en hefðu skilið börnin og gamla fólkið eftir heima.

Mér finnst þetta lýsa þeim þjóðfélagsbreytingum sem hafa átt sér stað afar vel. Ég vil reyndar ekki kalla þetta eigingirni kvenna, heldur hefur samfélagið ekki brugðist eða getað brugðist nógu hratt við þeirri breytingu að konur hættu að vera húsmæður í fullu starfi, sem sinntu eldri og yngri fjölskyldumeðlimum um leið.

Fjárhagsstaða hins opinbera hefur í gegnum áratugina haft mikið um það að segja að ekki hefur verið bolmagn til, en með sífellt öflugra atvinnulífi sem skapar tekjur í samfélaginu, hefur Grettistaki verið lyft, þótt margt sé enn ógert.

En fleira kemur til.

Þegar við erum með launakerfi sem er með um 80% yfirvinnuálag erum við að refsa þeim sem sinna fjölskyldum sínum með því að vinna eðlilegan vinnudag umfram þá sem ekki gera það eða eiga ekki börn. Yfirleitt eru það konurnar sem svo vinna styttri vinnudag, meðan að karlinn vinnur lengur og aflar því enn meiri tekna. Gæti trúað að þetta skýri stóran hluta af þeim óútskýrða launamun sem er á körlum og konum og því er lækkun yfirvinnuálagsins og tilsvarandi hækkun dagvinnulauna leið til lausnar á því vandamáli um leið og það hvetur foreldra til að vera heima hjá börnunum sínum og verður til að bæta samfélagið í heild sinni og velferð okkar allra.

Framsókn hefur þá stefnu að ríkið eigi að ganga á undan með góðu fordæmi í næstu kjarasamningum og setja þannig línuna fyrir restina af vinnumarkaðinum.

Einmana börn auðveld bráð

Frekari upplýsingar um kortið

1.         Mögulegt

Svæði þar sem undirbúningur orkuvinnslu er langt kominn eða á lokastigi.  Virkjun möguleg svo fremi að skipulag viðkomandi sveitarfélaga heimili, samningar náist við landeigendur þar sem það á við og mat á umhverfisáhrifum framkvæmda sé jákvætt.

2.         Alþingi ákveði verndun eða nýtingu að undangengnu mati

Svæði sem skoðuð verði í verndar- og nýtingaráætlun fyrir vatnsafl og auðlindir í jörðu. Svæði þessi eru þau sem raðast í flokk a og b með tilliti til umhverfisáhrifa í  rammaáætlun um nýtingu vatnsafls og jarðvarma. Áætlunin verði afgreidd frá Alþingi á næsta kjörtímabili.  Samþykkt Alþingis leggi því línur um frekari nýtingu og vernd.

3.         Röskun óheimil.

Svæði sem unnið hefur verið með í starfi Rammáætlunar um nýtingu vatnsafls og jarðvarma, sem að mati Framsóknarflokksins koma ekki til álita til orkunýtingar.

Orkukostir - skýringar

Mögulegt

Svartsengi - jarðhiti                   Hitaveita Suðurnesja vinnur að 30 MW stækkun.  MÁU ekki lokið en vinnsluleyfi fengið.

Hellisheiði - jarðhiti                   Stækkun upp á samtals 210 MW í MÁU. Virkjanleyfi fengið fyrir 70MW.

Ölkelduháls - jarðhiti                Áform Orkuveitu Reykjavíkur um 120 MW.  MÁU ekki lokið.

Hverahlíð - jarðhiti                   Áform Orkuveitu Reykjavíkur um 90 MW.  MÁU ekki lokið.

Nesjavellir - jarðhiti                  Stækkun um 30 MW.  Vinnsluleyfi fengið, en MÁU ekki lokið.

Neðri Þjórsá - vatnsafl             Samtals 280 MW í Hvamms-, Núps- og Urriðafossvirkjunum.  MÁU lokið.

Búðarháls - vatnsafl                  75 MW.  Landsvirkjun með virkjanaleyfi útg. 2001.

Bjarnaflag - jarðhiti                   Stækkun og áform um 80 MW, en heimild í lögum fyrir 40 MW að uppfylltum skilyrðum.

Krafla - jarðhiti                        Áformuð stækkun um 40 MW.  MÁU stendur yfir.

Krafla, vestursvæði                   120 MW, rannsóknarboranir hafa staðið yfir frá 2002.

Þeistareykir, jarðhiti                  Áform um 120 MW og ferli MÁU stendur yfir  

Alþingi ákveði verndun eða nýtingu að undangengnu mati

Krýsuvík - jarðhiti                    Fjögur aðskilin jarðhitasvæði,  Seltún-Sveifluháls, Austurengjahver, Trölladyngja og Sandfell.  Hitaveita Suðurnesja með rannsóknarleyfi á sumum svæðanna.  Orkugeta óviss.

Brennsteinsfjöll -jarðhiti            Líklega lítil orkugeta. b-flokkur umhverfisáhrifa Rammaáætlunar 1. áfanga.

Hólmsá - vatnsafl                     Lítil orkugeta, a-flokkur umhverfisáhrifa Rammaáætlunar 1. áfanga.

Skaftá - vatnsafl                       Orkugeta í meðallagi, b-flokkur umhverfisáhrifa Rammaáætlunar 1. áfanga.

Skaftárveita - vatnsafl               Vatnsmiðlun til vatnasviðs Þjórsár og Tungnár.  Lítil orkugeta, b-flokkur umhverfisáhrifa Rammaáætlunar 1. áfanga.

Norðlingaölduveita                    Vatnsmiðlun. Leyfi í raforkulögum frá 2004. Lagaleg óvissa og hluti framkvæmdar eins og lýst var í MÁU setts umhverfisráðherra hnekkt fyrir dómi.  Rétt að Alþingi ákveði framhaldið. d-flokkur umhverfisáhrifa Rammaáætlunar 1. áfanga.

Hágöngur - jarðhiti                   Rannsóknarleyfi ekki veitt.  a-flokkur umhverfisáhrifa Rammaáætlunar 1. áfanga.

Fljótshnjúkur - vatnsafl             Í Skjálfandafljóti.  Tiltölulega lítil orkugeta. b-flokkur umhverfisáhrifa Rammaáætlunar 1. áfanga.

Jökulsár í Skagafirði                  Virkjanakostir verði metnir heildstætt þegar skipulag svæðisins

- vatnsafl                                  liggur fyrir, þó ekki fyrr en eftir árið 2010.

Leirhnjúkur - jarðhiti                 Landsvirkjun hefur rannsóknarleyfi og jarðhitanýtingarréttindi á öllu Kröflusvæðinu, þ.m.t. Leirhnjúkssvæðinu.  Lagst hefur verið gegn rannsóknarborunum vegna náttúrufars.  Möguleiki getur verið á skáborunum frá Kröflu. b-flokkur umhverfisáhrifa Rammaáætlunar 1. áfanga.

Gjástykki - jarðhiti                   Sótt hefur verið um rannsóknarleyfi, orkugeta óviss. Svæðið ekki tekið með í 1. áfanga Rammaáætlunar.

Röskun óheimil

Grændalur - jarðhiti                  Orkugeta óviss, c-flokkur  umhverfisáhrifa Rammaáætlunar 1. áfanga.

Emstrur - vatnsafl                     Orkugeta í meðallagi, e-flokkur umhverfisáhrifa Rammaáætlunar 1. áfanga.

Markarfljót - vatnsafl                Orkugeta í meðallagi, e-flokkur umhverfisáhrifa Rammaáætlunar 1. áfanga.

Torfajökull - jarðhiti                  Fimm aðskilin svæði.  Mjög mikil orkugeta.  Er innan Friðlands að Fjallabaki.  d-flokkur umhverfisáhrifa Rammaáætlunar 1. áfanga.

Geysir - jarðhiti                        Geysir er friðlýstur.  Skoðað í 2. áfanga Rammaáætlunar

Kerlingarfjöll - jarðhiti              Sótt hefur verið um rannsóknarleyfi. Í skoðun í 2. áfanga Rammaáætlunar.

Hveravellir - jarðhiti                  Friðlýstir sem náttúruvætti. Í skoðun í 2. áfanga Rammaáætlunar.

Hrafnabjörg - vatnsafl               Í Skjálfandafljóti.  Í c-flokki í 1. áfanga Rammaáætlunar.

Vonarskarð - jarðhiti                Innan marka Vatnajökulsþjóðgarðs. Í skoðun í 2. áfanga Rammaáætlunar.

Kverkfjöll - jarðhiti                   Innan marka Vatnajökulsþjóðgarðs. Í skoðun í 2. áfanga Rammaáætlunar.

Askja - jarðhiti                         Innan marka Vatnajökulsþjóðgarðs. Í skoðun í 2. áfanga Rammaáætlunar.

Jökulsá á Fjöllum - vatnsafl       Innan marka Vatnajökulsþjóðgarðs.  Mjög mikil orkugeta. Í e-flokki í 1. áfanga Rammaáætlunar.

Hrúthálsar - jarðhiti                  Í skoðun í 2. áfanga Rammaáætlunar.

Fremrinámar - jarðhiti               Í skoðun í 2. áfanga Rammaáætlunar.

Framsóknarflokkurinn kynnir sáttatillagu í virknanamálum

Pólitísk keilusláttur mót betri vitund

Í ársreikningi Strætó bs kemur fram að tap á rekstri Strætó var verulegt. Við því er hægt að bregðast á þrennan hátt.

1. Halda áfram og fara á hausinn með samlagið.
2. Leggja meira fé í reksturinn til að mæta hallanum
3. Draga úr kostnaði.

Það er vilji nýs meirihluta í borginni að leggja meira fé í reksturinn, en meðan nágrannasveitarfélögin vilja ekki leggja meira fé til rekstrarins er 2. möguleikinn úr sögunni, því það er ekki eðlilegt að Reykjavíkurborg fari að greiða fyrir almenningssamgöngur nágrannasveitarfélaganna. Er Strætó bs því nauðugur sá kostur að draga úr kostnaði og það verður ekki gert nema með því að draga úr þjónustu, því miður. Fyrsti möguleikinn kemur auðvitað ekki til greina.

Í grænum skrefum meirihlutans voru kynnt nokkur atriði sem eiga að verða til þess að auka notkun á almenningssamgöngum og gera hana þægilegri. Frítt í strætó þýðir í framkvæmd að Reykjavíkurborg kaupir fargjöld fyrir borgarbúa af Strætó bs, en biðskýlin eru á forræði borgarinnar og því hægt að bæta þjónustu í þeim með bættum merkingum og upplýsingagjöf.

Meðan að borgin er í byggðasamlaginu er Reykjavíkurborg ekki einráð um þá þjónustu sem hún getur veitt og því lendum við í þessari stöðu. Því miður.

Þetta veit minnihlutinn og er að slá ódýrar pólitískar keilur með því að mótmæla þessu án þess að leggja til hvernig eigi að spara þennan kostnað á annan hátt.

Deilt um fyrirhugaðar breytingar á leiðakerfi Strætó bs.

Spurning hvort um sé að ræða landbúnað

Mér finnst alveg hægt að setja spurningamerki við það hvort kjötframleiðsla sem alfarið er byggð á innfluttu fóðri sé hægt að kalla íslenskan landbúnað. Framleiðslufyrirtækin eru orðin afar stór, í rauninni iðnfyrirtæki. Það má alveg hugsa þá hugsun hvort það sé þjóðhagslega hagkvæmara að klára framleiðsluna og flytja inn færri kíló og þá af kjöti í stað þess að flytja inn fleiri kíló af kjarnfóðri.

Reyndar þarf einnig að huga að matvælaöryggi í þessu sambandi.

Danskir svínakjötsframleiðendur ætla inn á íslenskan markað

Greinilegt að hagkerfið þarf enga handbremsu

Það er áhugavert að lesa nýja þjóðhagsspá. Meginniðurstaða hennar er að allur málflutningur stjórnarandstöðunnar um efnahagslífið er ekki réttur. Slakinn sem stjórnaandstaðan vill ná með því að taka í handbremsuna er þegar innbyggður í kerfið, svo ef áform hennar koma til framkvæmda verður ekki kæling, heldur frysting á hagkerfinu.

Mér þykir nóg um að verið sé að spá 3,2% atvinnuleysi . Guð forði okkur frá því að það verði meira, því það að vera atvinnulaus um langan tíma er eitt það mesta böl sem fyrir nokkurn mann getur komið. Þannig að áfram árangur - ekkert stopp er svo sannarlega leiðarljós sem vert er að fylgja.

Mjúkri lendingu hagkerfisins spáð

Íhaldið akkerið í stjórnmálunum!

Geir H Haarde greinir stöðu eigin flokks nokkuð vel í Viðskiptablaðinu í dag. Segir hann að Sjálfstæðisflokkurinn sé akkerið í íslenskum stjórnmálum.

Akkeri halda skipum föstum, erfitt er að draga þau af stað og hreyfast þau hægt þegar akkerið er niðri.

Þeir sem hafa fylgst með kosningabaráttu íhaldsins núna og reyndar undanfarnar kosningar hafa séð að þeir segja nánast ekki neitt, annað en að vel hafi gengið hingað til. Lítil nýsköpun og lítill frumleiki einkennir þeirra ályktanir, fyrir utan það sem frjálshyggjumennirnir koma inn, svona rétt til að minna á að flokkurinn sé hægriflokkur. Báknið burt og viðlíka yfirlýsingar eru löngu þagnaðar.

Það er eðlilegt, miðað við gengið í skoðanakönnunum, forystan vill engan styggja og stefnumótunin í rauninni sú að taka ávallt lægsta samnefnara, mál sem komin er almenn sátt um í öllu samfélaginu, en þau sem hugsanlega geta valdið ágreiningi eru einfaldlega ekki rædd og stungið undir stól. Má þar nefna þau löngu tímabæru mál sem Halldór Ásgrímsson setti af stað um endurskoðun stjórnarskrárinnar og endurskipulagningu stjórnarráðsins.

Hvað vill Samfylkingin í verndun og nýtingu?

Í stefnu Samfylkingarinnar um umhverfismál segir að stækka beri Vatnajökulsþjóðgarð með friðun Langasjávar, stækka friðlandið í Þjórsárverum og tryggja friðun Kerlingarfjalla, Brennisteinsfjalla, Jökulánna í Skagafirði, Skjálfandafljóts, Torfajökulssvæðisins og Grændals.

Gott og vel. Ég get vel tekið undir friðun margra af þessum svæðum, en hvernig gengur það upp að um leið og lagt verði í friðun þessara svæða, vilji Samfylkingin um leið að ákvörðunum um frekari stóriðjuframkvæmdir verði frestað þangað til að fyrir liggi nauðsynlegt heildarsýn yfir verðmæt náttúrusvæði og verndun þeirra hefur verið tryggð?

Reyndar er ekkert að marka, frekar en fyrri daginn. ISG sagði í sjónvaræpinu um daginn að hún vilji ekki að hætt verði við verkefni sem ríkið gæti bakað sér skaðabótaábyrgð á, taki hún í handbremsuna. Sem sagt: ISG virðist vera orðin algerlega sammála Framsókn í þessum málum. Batnandi fólki er best að lifa...